INDvNZ : ஃபர்ஸ்ட் பேட்டிங்னா கொஞ்சம் அப்படி இப்படிதான் இருக்கும் - சமர் செய்யுமா இந்தியா?

இந்தியா Vs நியூசிலாந்து

சாம்பியன்ஸ் டிராபியில் இந்தியா மற்றும் நியூசிலாந்து அணிகளுக்கிடையேயான போட்டி துபாயில் நடந்து வருகிறது. இந்தப் போட்டியில் முதலில் பேட் செய்து வரும் இந்திய அணி 50 ஓவர்களில் 249 ரன்களை எடுத்திருக்கிறது.

ரோஹித்

டாஸை நியூசிலாந்து கேப்டன் சாண்ட்னர்தான் வென்றிருந்தார். ஆனாலும் முதலில் பேட்டிங் ஆட வேண்டும் என்பதை தானுமே விரும்பியதாக ரோஹித் கூறினார். முதல் இரண்டு போட்டிகளிலும் டார்கெட்டை சேஸ் செய்தோம். இந்தப் போட்டியில் எங்களை நாங்களே சவாலுக்குள் தள்ளிக்கொள்ள முதலில் பேட் செய்யவே விரும்பினோம் என ரோஹித் பேசியிருந்தார். ஹர்ஷித் ராணாவுக்கு பதில் வருண் சக்கரவர்த்தி அணியில் சேர்க்கப்பட்டிருந்தார். அவர் பேசியதை போலவே முதல் பேட்டிங் என்பது இந்தியாவுக்கு கொஞ்சம் சவாலாகத்தான் இருந்தது.

கில், ரோஹித், விராட் கோலி என இந்தியாவின் டாப் 3 வீரர்கள் மூவரும் பவர்ப்ளேக்குள்ளாகவே அவுட் ஆகிவிட்டனர். ரோஹித் பவுண்டரி சிக்சர் என துடிப்பாக இன்னிங்ஸை ஆரம்பிக்க இன்னொரு பக்கம் கில் மேட் ஹென்றி வீசிய 3 வது ஓவரிலேயே இரண்டு ரன்களில் lbw முறையில் அவுட் ஆகி சென்றார். ரோஹித் மேலும் அதிரடியாக ஆடுவார் என எதிர்பார்க்கையில்,ஜேமிசன் வீசிய 6 வது ஓவரில் அவுட் ஆனார். ஷார்ட்டாக வந்த பந்தை மடக்கி லெக் சைடில் பவுண்டரியாக்க முயன்றார். ஆனால், மிட் விக்கெட்டை க்ளியர் செய்ய முடியாமல் கேட்ச் ஆகி 11 ரன்களில் அவுட்.

'க்ளென் பிலிப்ஸ் சூப்பர் மேன் கேட்ச்!'

மேட் ஹென்றி வீசிய அடுத்த ஓவரிலேயே கோலியும் அவுட். நல்ல லெந்த்தில் வந்த பந்தை பேக்வர்ட் பாய்ண்ட்டில் பவுண்டரியாக்க முயன்றார். ஆனால், க்ளென் பிலிப்ஸ் காற்றில் பறந்து அற்புதமாக கேட்ச்சை பிடித்தார். நல்ல ஷாட்டை ஆடியிம் பிலிப்ஸின் அபாரமான பீல்டிங்கால் கோலி 11 ரன்களில் அவுட் ஆனார். 'இவரெல்லாம் சர்க்கஸில் இருந்திருக்க வேண்டிய நபர்.' என வர்ணனையில் பிலிப்ஸை நகைச்சுவையாகப் பாராட்டினார் ரவி சாஸ்திரி.

Glenn Phillips

'ஸ்ரேயஸ் - அக்சர் பார்ட்னர்ஷிப்'

பவர்ப்ளே முடிவில் இந்திய அணி 37 ரன்களுக்கு 3 விக்கெட்டுகளை இழந்திருந்தது. அக்சர் படேலும் ஸ்ரேயஸ் ஐயரும் இந்தியாவை சரிவிலிருந்து மீட்கும் முயற்சியில் இறங்கினர். இருவரும் இணைந்து 98 ரன்களுக்கு பார்ட்னர்ஷிப்பும் அமைத்தனர். விக்கெட்டை காக்க ஆரம்பத்தில் இருவருமே நின்று நிதானமாக ஆடினர். 6.4 வது ஓவரில் இந்தியா கடைசியாக பவுண்டரி அடித்திருந்தது. அதன்பிறகு 51 பந்துகள் கழித்து சாண்ட்னரின் பந்தில் அக்சர் படேல் ஒரு பவுண்டரி அடித்தார். இங்கிருந்து இருவரும் கொஞ்சம் வேகம்பிடித்தனர். வில்லியம் ரூர்கி வீசிய அடுத்த ஓவரில் பின்னங்காலை ஊன்றி மூன்று பவுண்டரிகளை அடித்து அசத்தினார் ஸ்ரேயஸ் ஐயர். ஆனாலும் இந்த மிடில் ஓவர்கள் ஆடுவதற்கு கொஞ்சம் சிரமமாகவே இருந்தது. சாண்ட்னர் திடீரென 75 கி.மீ வீசினார், திடீரென 95 கி.மீ இல் வீசினார்.

Shreyas - Axar

வேக மாறுபாடுகளோடு சரியான லெந்தைப் பிடித்து வீசிய பந்துகளில் இந்திய பேட்டர்கள் கொஞ்சம் சுணங்கினர். ஒரு கட்டத்தில் ரச்சின் ரவீந்திராவும் இவரோடு இணைந்தார். அவர் 90 கி.மீ க்கு மேல் வீச ஒரு பந்தை மடக்கி ஆட முற்பட்டு 42 ரன்களில் அக்சர் படேல் கேன் வில்லியம்ஸிடம் கேட்ச் ஆனார். ஸ்ரேயாஸ் ஐயர் இதன்பிறகும் நின்று ஆடினார். ரூர்கி, ரச்சின் ரவீந்திரா போன்றோரின் பந்தில் சிக்சர்களைப் பறக்கவிட்டார். அரைசதத்தை கடந்தார். நின்று ஆடி சதத்தை எட்டுவார் என நினைக்கையில் ரூர்கியின் பந்தில் பெரிய ஷாட்டுக்கு முயன்று 79 ரன்களில் வில் யங்கிடம் கேட்ச் ஆனார். இந்த சமயத்தில் அடுத்தடுத்து விக்கெட்டும் விழுந்தது. கே.எல்.ராகுல் 23 ரன்களில் சாண்ட்னரின் பந்தில் எட்ஜ் ஆகி கீப்பர் டாம் லேதமிடம் கேட்ச் ஆனார். ஜடேஜா மேட் ஹென்றியின் பந்தில் 16 ரன்களில் அவுட். 250 ரன்களை எட்டுவதே சிரமம் எனத் தோன்றியது.

'ஹர்திக் கேமியோ!'

இந்த சமயத்தில்தான் ஹர்திக் பாண்ட்யா மதிப்புமிக்க கேமியோவை ஆடினார். 49 வது ஓவரில் மட்டும் 2 பவுண்டரி ஒரு சிக்சருடன் 15 ரன்களை சேர்த்தார். 45 ரன்களை மொத்தமாக அடித்திருந்தார். கடைசி ஓவரில் இன்னும் வேகமாக ஆடி ரன் எடுப்பார் என எதிர்பார்க்கையில் மேட் ஹென்றியின் பந்தில் ரச்சினிடம் கேட்ச் ஆனார். இந்திய அணி 50 ஓவர்களில் 9 விக்கெட்டுகளை இழந்து 249 ரன்களை எடுத்திருந்தது. மேட் ஹென்றி 5 விக்கெட்டுகளை வீழ்த்தியிருந்தார்.

Hardik

இதுவரை ஆடியிருக்கும் 3 போட்டிகளில் இந்தப் போட்டியில்தான் இந்திய அணி ரொம்பவே சுமாராக பேட்டிங் ஆடியிருக்கிறது. பௌலர்களுக்கு பெரிய சவால் காத்திருக்கிறது. டார்கெட்டை டிபண்ட் செய்வார்களா என்பதைப் பொறுத்திருந்து பார்ப்போம்.